Home / ਚੀਨੀ ਸੈਨਿਕ ਭਾਰਤੀ ਚੌਕੀ ਨੇੜੇ ਡਟੇ

ਚੀਨੀ ਸੈਨਿਕ ਭਾਰਤੀ ਚੌਕੀ ਨੇੜੇ ਡਟੇ

ਪੂਰਬੀ ਲੱਦਾਖ ‘ਚ ਅਜੇ ਵੀ ਤਣਾਅ ਬਣਿਆ ਹੋਇਆ ਹੈ ਅਤੇ ਚੀਨ ਦੀ ਪੀਪਲਜ਼ ਆਰਮੀ (ਪੀ.ਐਲ.ਏ.) ਦੇ 30-40 ਦੇ ਕਰੀਬ ਸੈਨਿਕ ਅਜੇ ਵੀ ਪੂਰਬੀ ਲੱਦਾਖ ‘ਚ ਭਾਰਤੀ ਚੌਕੀ ਰੇਜ਼ਾਂਗ-ਲਾ ਰਿਜਲਾਈਨ ਨੇੜੇ ਡਟੇ ਹੋਏ ਹਨ। ਦੋਵਾਂ ਧਿਰਾਂ ਨੇ ਹਮਲਾਵਰ ਰੁਖ ਅਪਣਾਇਆ ਹੋਇਆ ਹੈ। ਭਾਰਤ ਨੇ ਪੈਂਗੌਂਗ ਝੀਲ ਦੇ ਦੱਖਣੀ ਕਿਨਾਰੇ ਨਾਲ ਲੱਗਦੀਆਂ ਉੱਪਰੀ ਚੋਟੀਆਂ ‘ਤੇ ਸਥਿਤੀ ਮਜ਼ਬੂਤ ਬਣਾਈ ਹੋਈ ਹੈ, ਜਿੱਥੋ ਉਹ ਚੀਨ ਦੀ ਕਿਸੇ ਵੀ ਹਰਕਤ ‘ਤੇ ਨਜ਼ਰ ਰੱਖ ਰਹੇ ਹਨ। ਇਸ ਤੋਂ ਇਲਾਵਾ ਭਾਰਤ ਨੇ ਇੱਥੇ ਵਾਧੂ ਸੈਨਿਕਾਂ ਅਤੇ ਹਥਿਆਰਾਂ ਦੀ ਤਾਇਨਾਤੀ ਕੀਤੀ ਹੋਈ ਹੈ।

ਭਾਰਤੀ ਸੈਨਾ ਦੇ ਫੀਲਡ ਕਮਾਂਡਰਾਂ ਨੂੰ ਸਖ਼ਤ ਨਿਰਦੇਸ਼ ਦਿੱਤੇ ਗਏ ਹਨ ਕਿ ਕਿਸੇ ਵੀ ਕੀਮਤ ‘ਤੇ ਚੀਨੀ ਸੈਨਿਕ ਸਰਹੱਦ ਪਾਰ ਨਾ ਕਰ ਸਕਣ। ਨਾਲ ਇਹ ਵੀ ਕਿਹਾ ਗਿਆ ਹੈ ਕਿ ਭਾਰਤੀ ਸੀਮਾ ਦੀ ਸੁਰੱਖਿਆ ਕਰਨ ਦੌਰਾਨ ਸੈਨਿਕਾਂ ਨੂੰ ਸਖ਼ਤ ਅਨੁਸ਼ਾਸਨ ਦੀ ਵੀ ਪਾਲਣਾ ਕਰਨੀ ਹੈ। ਫੀਲਡ ਕਮਾਂਡਰਾਂ ਨੂੰ ਇਹ ਕਿਹਾ ਗਿਆ ਹੈ ਕਿ ਜਦ ਉਹ ਆਪਣੇ ਇਲਾਕਿਆਂ ‘ਚ ਗਸ਼ਤ ਕਰਨ ਤਾਂ ਇਸ ਦੌਰਾਨ ਆਪਣੀ ਤਾਕਤ ਦੀ ਨੁਮਾਇਸ਼ ਨਾ ਕਰਨ। ਉਧਰ ਚੀਨ ਨੇ ਸਰਹੱਦ ‘ਤੇ ਕਰੀਬ 50 ਹਜ਼ਾਰ ਜਵਾਨ ਭਾਰੀ ਟੈਂਕ ਅਤੇ ਹਥਿਆਰ ਤਾਇਨਾਤ ਕਰ ਲਏ ਹਨ। ਸਰਕਾਰੀ ਸੂਤਰਾਂ ਨੇ ਦੱਸਿਆ ਹੈ ਕਿ ਮਾਸਕੋ ‘ਚ ਭਾਰਤ ਤੇ ਚੀਨ ਦੇ ਵਿਦੇਸ਼ ਮੰਤਰੀਆਂ ਵਿਚਾਲੇ ਹੋਣ ਵਾਲੀ ਅਹਿਮ ਬੈਠਕ ਤੋਂ ਪਹਿਲਾਂ ਬੁੱਧਵਾਰ ਨੂੰ ਦੋਹਾਂ ਦੇਸ਼ਾਂ ਦੇ ਸੈਨਿਕ ਕਮਾਂਡਰਾਂ ਵਲੋਂ ਪੂਰਬੀ ਲੱਦਾਖ ‘ਚ ਬੈਠਕ ਕੀਤੀ ਗਈ ਹੈ ਅਤੇ ਤਣਾਅ ਨੂੰ ਘਟਾਉਣ ਲਈ ਹਾਟਲਾਈਨ ‘ਤੇ ਸੁਨੇਹਿਆਂ ਦਾ ਆਦਾਨ-ਪ੍ਰਦਾਨ ਕੀਤਾ ਗਿਆ ਹੈ।